© / Quelle: NWZ-Online / 28.02.2005

Datt eenzigst Vergnögen

Watt kann datt woll schöners gewen, ass Bewegung an frisch Luft und wenn man sück doorbi noch sportlich vergnögen kann, denn iss de Minsch doch rundümm to free. Ji maakt datt woll all, woor ick uppdool will, datt iss uns Freesenspoort, datt Boßeln, datt sünnt ja nich nur de Boßelvereene, de Sooterdoogs und Sönndoogs upp Stroot sünnt. Nee, aal de annem Vereene, off datt nun Footballers, Kegelklubs, oder Handballers sünnt, mit Kind und Kegel, Bollerwoogen mit Schluck und Beer, Grogg und Glühwien, Mettwurst und Schmolltbroot, so treckt se öwer de Srooten und meent, datt se watt vör de Gesundheit doot, off faalt datt villicht ook ünner Vergnögen? Wenn ji weesen willt, woorheer ick datt weet, denn moot ick togeeben, datt ick sülben ook all mittrucken bünn und bünn door achter koo’m, datt Boßeln doch ook gefährlich iss. Datt iss fooken doch nich verwunnerlich, datt de Schandarms Strootenkontrollen mookt und wenn datt weesen moot, datt Boßeln verbee’t. Wer datt Boßeln to sien Vergnögen bedriewen will, de schull sück doch von datt Strootenverkehrsamt een Genehmigung hool’n, door steiht alln’s drinn, watt man beachten schall, denn kann Boßeln ook to een Vergnöögen weer’n.
Doch ook ünner de aktiven Boßlers löppt datt nich immer so ass datt woll schall. Sönndagg vör Sönndagg wedderhool sück datt Spillwark, datt een Boßler öwer de Stroot humpel’n de und schlecht to Foot weer. Sien Fründ kann datt nich meer mit ankieken und frocht ümm minsch Keerl, watt schoot di, hest di de Foot verstuukt? Nee, seggt he, ick hebb to enge Schoo an und Höhneroogen. Ja Mann, seggt sien Fründ, denn koop di doch grötter Schoo und schmiet disse in de Mülltünn. Bloos datt nich, seggt he, disse Schoo sünnt mien eenzigst Vergnögen, wie keehrt no datt Boßeln ja immer noch in denn Kroog in und wenn ick obends denn no Huus koom, schellt min Froo mit mi, woor ick so lang weesen bünn, Hund hett Nobers Kind beeten, Jung hett sien Fründ verhau n, min Froo ballert mi datt kolle Eeten upp denn Disch und wenn ick denn min Schoo uttrecken kann, datt iss min eenzigst „Vergnögen“.